शुक्रबार, १६ चैत २०८०
DainikNepal.com
शुक्रबार, १६ चैत २०८०

‘कैदीको पत्र’ को फर्स्टलुकमा तीन वटा पोस्टर सार्वजनिक

दैनिक नेपाल २०७९ वैशाख २ गते ८:३३

काठमाडौं, २ वैशाख । नेपाली कथानक चलचित्र ‘कैदीको पत्र’ को नयाँ वर्ष ०७९ को अवसर पारेर बिहीबार फर्स्ट लुकस्वरुप तीन वटा फरक–फरक डिजाइनका पोस्टर सार्वजनिक गरिएको छ ।

सनमकुमार बैैराग निर्देशित चलचित्रको प्रदर्शन मिति भने केही समयभित्रै तय गरिने बताइएको छ । साहित्यकार स्व. ईश्वर मानन्धरको चर्चित कथा ‘कैदीको पत्र’ मा आधारित चलचित्रको पटकथा र सम्वाद निर्देशक बैरागकै हो । सन् २०१९ को जुलाइमा सुटिङ सम्पन्न भएको चलचित्र स्कटल्याण्डको क्रिफ, आवरफेल्दी, केनमोर, ओवन, किलिड्ग र ग्लास्कोलगायत स्थानमा खिचिएको हो ।

चलचित्रमा बेलायती कलाकार माडिशन लाजारोश, क्यारी डुड्स, लरेन्स वेस्टवरी, फस्तासका साथमा सुवर्ण थापा, सलिना थापामगर, कुनाल विश्व, पृथ्वीराज खत्री, चरण प्रधान, मनिष श्रेष्ठ, प्रसुना कँडेल, सुस्मिता थापा, बिभिया श्रेष्ठ, बिजया श्रेष्ठ, कलिना श्रेष्ठ तथा बालकलाकार किरण कार्की र तपस्या शिवाकोटीले अभिनय गरेका छन् ।

बेलायतका लागि तत्कालीन नेपाली राजदूत दुवसु क्षेत्री समेत राजदूतकै भूमिकामा अभिनित चलचित्र कोरोना महामारीका कारण प्रदर्शन हुन सकेको थिएन । ३५ प्रतिशत अङ्ग्रेजी भाषामा रहेको चलचित्र माया, प्रेम, पारिवारिक सम्बन्ध जस्ता सम्बेदनशील बिषयमा केन्द्रित रहेको जानकारी निर्देशक बैरागले दिएका छन् ।

रामेश्वर कार्कीले खिचेको चलचित्रको निर्मातामा हिराल जोशी, नानी हेरा, कैलाश विश्वकर्मा र दील घले छन् । निर्देशक बैरागकै गीत, कबिराज गहतराजको कोरियोग्राफी, सम्राट बस्नेतको द्वन्द्व निर्देशन तथा बिनम्र कर्माचार्य र सुरेश सेन्चुरीको संगीत रहेको चलचित्र भिजन संसारको प्रस्तुतिमा बिरञ्जना इन्टरटेन्मेन्ट, महारानी इन्टरटेन्मेन्ट युके र मुभी मेकर्स क्लवले निर्माण गरेको हो । चलचित्रको बितरण आरआर फिल्मस्ले गर्दैछ ।

प्रतिक्रिया
सम्बन्धित